फिदिम, कात्तिक २२ । पाँचथर जिल्लामा खोरेत रोग नियन्त्रणका लागि करिब ६६ हजार पशु चौपायालाई खोप लगाइने भएको छ। भेटेनरी अस्पताल तथा पशु सेवा विज्ञ केन्द्र पाँचथरका अनुसार दुध उत्पादनमा संलग्न गाई, भैंसी र चौंरीलाई लक्षित गरी खोप अभियान सञ्चालन गरिन लागिएको हो।
स्वस्थ दुध उत्पादन र दुग्धजन्य वस्तुको गुणस्तर सुधारसँगै निर्यात वृद्धि गर्ने उद्देश्यका साथ अभियान सुरु गर्न लागिएको भेटेनरी केन्द्रले जनाएको छ। पहिलो चरणमा दुधका मुख्य स्रोत गाई, भैंसी र चौंरीलाई खोप लगाइने छ। पशु प्राविधिकका अनुसार खोप लगाइएका जनावरबाट प्राप्त दुध, घिउ र छुर्पी खोरेत रोगका जीवाणुबाट सुरक्षित हुनेछन्।
तीन तहका सरकारबीचको सहकार्यमा सञ्चालन हुने यो खोप अभियान कात्तिक २३ देखि मङ्सिर २३ गतेसम्म चल्नेछ। यसका लागि जिल्लाका सबै पालिकाका पशु सेवा शाखा तथा सरोकारवालाको सहभागितामा तयारी बैठक सम्पन्न भएको भेटेनरी कार्यालयले जनाएको छ।
अभियानमार्फत जिल्लाका एक नगरपालिका र सात गाउँपालिका गरी आठवटै स्थानीय तहका करिब ६६ हजार जनावरलाई खोप लगाइनेछ। संघीय सरकारले खोप उपलब्ध गराउने, प्रदेश सरकारले आर्थिक सहयोग गर्ने र स्थानीय तहले समन्वय गर्ने व्यवस्था गरिएको छ।
यस अनुसार नगरपालिकालाई पाँच लाख र प्रत्येक गाउँपालिकालाई एक लाख २५ हजार रुपैयाँका दरले रकम उपलब्ध भएको बताइएको छ।
भेटेनरी अस्पतालका सूचना अधिकारी निरजकुमार भट्टराईका अनुसार सरकारले इलामलाई दुग्धजन्य पदार्थ उत्पादनका लागि पकेट क्षेत्रको रूपमा विकास गरिसकेकाले त्यसको विस्तार स्वरूप पाँचथरमा पनि खोरेतविरुद्धको खोप अभियान सुरु गरिएको हो।
गत वर्ष पहिलो चरणमा जिल्लाका ७८ हजार पशु चौपायालाई खोरेत रोगविरुद्ध खोप लगाइएको थियो। यसअघि गरिएको परीक्षणमा गाई, भैंसी र चौंरीका ६० नमुनामध्ये चारवटामा खोरेतका जीवाणु पाइएको भेटेनरी कार्यालयले जनाएको छ।
