नेपाल मजदुर किसान पार्टीका अध्यक्ष नारायणमान विजुक्छेँले प्रजातान्त्रिक सिद्धान्तविपरीत ठुला दलहरू भागबण्डाको राजनीतिमा लिप्त हुँदा देशले दुर्भाग्य भोगिरहेको बताएका छन्।
प्रजातन्त्रमा सबैभन्दा ठूलो दलले सरकार र दोस्रो ठूलो दलले प्रमुख प्रतिपक्षको भूमिका निर्वाह गर्नुपर्नेमा, नेपालमा भागबण्डाकै लागि दोस्रो ठूलो दलले सरकार चलाउनुले प्रजातन्त्रकै खिल्ली उडाएको उनको टिप्पणी थियो।
शनिबार भक्तपुरको देकोचास्थित ‘ख्वप कलेज अफ ल‘ ले आयोजना गरेको ‘फौजदारी कानुन र न्याय’ विषयक राष्ट्रिय सम्मेलनको उद्घाटन गर्दै अध्यक्ष विजुक्छेँले ठुला दलहरू मात्र नभई बुद्धिजीवीहरूसमेत व्यक्तिगत स्वार्थमा लाग्दा देश अप्ठ्यारो अवस्थामा पुगेको बताए।
उनले भने, ‘पढेलेखेका बुद्धिजीवीहरू पनि राजदूतजस्ता पद पाएपछि गलत कुराको समेत समर्थन गर्दै व्यक्तिगत स्वार्थमा डुब्नु दुःखद हो।’
फरक प्रसङ्गमा उनले सांसदहरूमा अध्ययनको कमी रहेकोमा चिन्ता व्यक्त गरे। एमसीसी सम्झौताको उदाहरण दिँदै उनले भने, ‘सांसदहरूले एमसीसीको पूरा पाठ नै नपढी पक्षमा हस्ताक्षर गरे। पार्टीले भन्यो भन्दैमा नपढीकनै हस्ताक्षर गर्नुपरेको बाध्यता सुनाए।’
उनले तत्कालीन प्रधानमन्त्री एवं नेपाली कांग्रेसका सभापति शेरबहादुर देउवाले समेत ‘मेरा सांसद साथीहरूले पढेका छन्, ठीक छ भनेका छन्, त्यसैले मैले पनि हस्ताक्षर गरें’ भनेको प्रसङ्ग उल्लेख गरे।
