लन्डन/काठमाडौं – चलचित्र ‘गोर्खा वारियर’ का निर्माता तथा अनुग्रह ग्रुपका अध्यक्ष सुमन राईले ६,४७६ मिटर अग्लो मेरा पिक हिमालको सफल आरोहण गरेका छन्। पूर्वगोर्खा सैनिक समेत रहेका राईले यो साहसिक यात्रापछि अब विश्वकै सर्वोच्च शिखर सगरमाथा आरोहण गर्ने तयारी थालेका छन्।
राईले शुक्रबार सामाजिक सञ्जालमार्फत सफल आरोहणको जानकारी दिँदै आफन्त, शुभेच्छुक र प्रवासी नेपाली संघ–संस्थालाई आभार प्रकट गरेका छन्। “फाइनल्ली मेरा पिक ६४७६ मिटर सबमिट गरियो। अब अनुग्रह फाउण्डेशनको च्यारिटी र ‘सेफ द प्लानेट’ अभियानसहित सगरमाथा चढ्ने योजना छ,” उनले लेखेका छन्।
अनुग्रह फाउण्डेशनले शिक्षा, स्वास्थ्य, बाटो, खानेपानी र विपद्पछिको राहतमा सहयोग गर्दै आएको गैर–नाफामूलक संस्था हो। राईले NCCA UK, NCC UK, तमु धिं UK, किरात राई यायोख्खा, खोटाङ सेवा समाज, थुलुङ राई समाजलगायत संस्थालाई समर्थनका लागि धन्यवाद दिएका छन्।
व्यवसाय र सामाजिक सेवामा सक्रिय
राईको नेतृत्वमा बेलायतमा सक्रिय अनुग्रह ग्रुप अन्तर्गत अनुग्रह ज्वेलर्स, न्यु अनुग्रह ज्वेलर्स, अनुग्रह बुलियन, अनुग्रह वाच लिमिटेड, अनुग्रह ट्राभल, अनुग्रह गोल्ड हाउस सञ्चालनमा छन्।
चलचित्र ‘गोर्खा वारियर’ को निर्देशन मिलन चाम्सले गरेका हुन्। गोर्खाली वीरताको इतिहास समेटिएको यस फिल्मको पहिलो प्रदर्शन बेलायतको लिसेस्टर स्क्वायरस्थित आइम्याक्स सिनिवर्ल्डमा गरिएको थियो, जसले नेपाली चलचित्र क्षेत्रमा नयाँ रेकर्ड बनाएको थियो।
अनुग्रह फाउण्डेशनले आफ्ना आम्दानीको १० प्रतिशत हिस्सा शिक्षा, स्वास्थ्य, खानेपानी, वृद्ध, बालबालिका तथा ग्रामीण विकासमा खर्च गर्दै आएको छ। ‘शून्यदेखि सगरमाथासम्म’ भन्ने नारासहित सुरु गरिएको अभियानको अर्को चरण सगरमाथा आरोहण र वातावरणीय सचेतनामाथि केन्द्रित हुनेछ।
पर्यावरण संरक्षणको सन्देश
राईको आगामी सगरमाथा आरोहण ‘Fundrise Social Campaign’ मार्फत ग्लोबल वार्मिङबिरुद्ध जनचेतना जगाउने र भविष्यका पुस्ताका लागि सुरक्षित पृथ्वीको सन्देश दिन केन्द्रित हुनेछ। यस अभियानमा अनुग्रह टिमका सदस्यहरूका साथै विभिन्न प्रवासी नेपाली संघ–संस्थाको सहभागिता रहनेछ।
