विराटनगर, साउन २५
नेपाल अन्तर्राष्ट्रिय कृष्णभावनामृत संघ (इस्कोन) विराटनगरले आउँदो साउन ३१ गते शनिबार विराटनगरको जैन भवनमा कृष्णजन्माष्टमीको अवसरमा विविध धार्मिक तथा सांस्कृतिक कार्यक्रम आयोजना गर्ने भएको छ। आइतबार पत्रकार सम्मेलन गर्दै इस्कोन विराटनगरले सो कार्यक्रमबारे जानकारी गराएको हो।
इस्कोन विराटनगरका सचिव भानुभक्त जोशीका अनुसार बिहान ५ बजेदेखि राती १ बजेसम्म सञ्चालन हुने कार्यक्रममा मंगल आरती, सामूहिक जप, गुरु पूजा, श्रीकृष्ण कथा, महानसिंह यज्ञ, अभिषेक, बालकृष्ण शृङ्गार प्रदर्शन, कीर्तन तथा श्रीकृष्ण जन्मोत्सव एवं महाअभिषेक समावेश रहने छन्।
त्यस्तै, चित्रकला र अन्तरविद्यालय नृत्य प्रतियोगिता, मङ्की फोड प्रतियोगिता, सांस्कृतिक झाँकी प्रदर्शनलगायतका कार्यक्रमहरू पनि हुनेछन्। चित्रकला प्रतियोगिता बिहान ११ बजेदेखि र नृत्य प्रतियोगिता दिउँसो ३ बजेदेखि सुरु हुनेछ।
कार्यक्रममा सहभागी २ हजार भक्तजनलाई महाप्रसाद वितरण गरिनेछ भने सांस्कृतिक प्रतियोगितामा विजेतालाई नगद पुरस्कार समेत प्रदान गरिने इस्कोन विराटनगरले जनाएको छ।
सांस्कृतिक कार्यक्रममा प्रथम, द्वितीय र तृतीय हुनेले ३० हजार, १५ हजार र ५ हजार रुपैयाँ पुरस्कार प्राप्त गर्ने छन्।
चित्रकला प्रतियोगितामा भने विजेताहरूलाई क्रमशः १५ हजार, १० हजार र ५ हजार रुपैयाँ प्रदान गरिनेछ।
कार्यक्रममा कोशी प्रदेशका प्रदेश प्रमुख पर्शुराम खापुङ प्रमुख अतिथि र सभामुख अम्मरबहादुर बिष्ट विशिष्ट अतिथिको रूपमा सहभागी हुनेछन्।
सचिव जोशीका अनुसार, अघिल्लो वर्षको कार्यक्रममा करिब १२ हजार भक्तजन सहभागी भएका थिए भने यस वर्ष २० हजार भक्तजनको सहभागिता अपेक्षित गरिएको छ।
भाद्र १ गते आइतबार निस्कने ५८औं श्रीराधाकृष्ण रथयात्रामा पनि झाँकी सहित इस्कोन विराटनगरले सहभागिता जनाउने जानकारी दिइएको छ।
कार्यक्रम सफल बनाउनका लागि करिब २५ देखि ३० लाख रुपैयाँसम्मको खर्च लाग्ने इस्कोन विराटनगरले अनुमान गरेको छ।
पत्रकार सम्मेलनमा उद्योगी तथा समाजसेवी बेनिगोपाल मुन्दडा, माहेश्वरी समाज विराटनगरका अध्यक्ष घनश्याम काबरा, उद्योगी जुगलकिशोर राठी, र रोटरीयन रामअवतार अग्रवाल सहभागी थिए।
