काठमाडौँ- नेपालको अग्रणी व्यावसायिक घराना पद्म ज्योति ग्रुपले विश्वप्रसिद्ध खाद्य कम्पनी रिच्स प्रोडक्टस कर्पोरेशनअन्तर्गतको रिच्स इन्डियासँगको सहकार्यलाई थप सुदृढ बनाउँदै विस्तार गरेको छ।
यस सहकार्यले नेपालको फुडसर्भिस तथा कुलिनरी क्षेत्रको विकास र विस्तारमा महत्वपूर्ण योगदान पुर्याउने विश्वास गरिएको छ।
‘रिच्स’ले विगत दुई दशकदेखि नेपालमा आफ्नो उपस्थिति जनाउँदै आएको भए पनि नयाँ सम्झौताले ग्राहकसँगको सम्बन्धलाई अझ गहिरो बनाउने, सेफहरूको क्षमता अभिवृद्धि गर्ने तथा नेपाली बजारअनुसारका विश्वव्यापी कुलिनरी ट्रेन्डहरू भित्र्याउने रणनीतिक लक्ष्य लिएको छ।
सन् १९४५ मा स्थापना भएको ‘रिच्स’ ८० वर्षभन्दा लामो विश्वव्यापी विरासत बोकेको पारिवारिक खाद्य कम्पनी हो। ‘नन-डेयरी ह्विप्ड टपिङ’ उत्पादनमा विश्वमै अग्रणी मानिने कम्पनीले आधुनिक बेकरी, डेजर्ट तथा फुडसर्भिस क्षेत्रमा नवीनता र गुणस्तरमार्फत विशिष्ट पहिचान बनाएको छ। भारतमा मात्र ३० वर्षभन्दा बढी समयदेखि सेवा दिँदै आएको कम्पनीले उपभोक्ताको बदलिँदो आवश्यकता अनुसार निरन्तर नवप्रवर्तनमा जोड दिँदै आएको छ।
विस्तारित सहकार्य वितरणमा मात्र सीमित नरही सेफ तथा फुडसर्भिस व्यवसायीसँग प्रत्यक्ष समन्वय, प्राविधिक तालिम, लाइभ डेमोस्ट्रेसन र ज्ञान आदानप्रदानमा केन्द्रित रहनेछ। यसमार्फत नेपालभरका सेफ, बेकर र हस्पिटालिटी व्यवसायीलाई ‘रिच्स’का उत्पादनको प्रभावकारी प्रयोगबारे जानकारी दिइनेछ, जसले स्वाद र गुणस्तरमा एकरूपता ल्याउन तथा मेनुमा नवीनता थप्न सहयोग गर्नेछ।
पद्म ज्योति ग्रुपले आफ्नो सुदृढ पूर्वाधार, स्थापित वितरण सञ्जाल र नेपाली बजारसम्बन्धी गहिरो बुझाइलाई पूर्ण रूपमा परिचालन गर्ने जनाएको छ। समूहले सन् २००७ मा Sun International Incorporated Pvt. Ltd. (एसआईआईपीएल) मार्फत एफएमसीजी क्षेत्रमा प्रवेश गरेको थियो। त्यसयता कम्पनीले आइसक्रिम र फ्रोजन डेजर्ट क्षेत्रमा आफ्नो उपस्थिति मजबुत बनाउँदै देशव्यापी वितरण विस्तार गरिरहेको छ।
नेपाली उपभोक्तालाई विश्वस्तरको उत्कृष्ट ‘गउर्मे’ अनुभव प्रदान गर्ने लक्ष्यसहित एसआईआईपीएलले आधुनिक रिटेल तथा हस्पिटालिटी क्षेत्रलाई उच्च गुणस्तरीय उत्पादनसँगै प्राविधिक मार्गदर्शनसमेत उपलब्ध गराउँदै आएको छ। समूहका अध्यक्ष Saurabh Jyoti को नेतृत्वमा कम्पनीले बदलिँदो जीवनशैली र स्वादलाई सम्बोधन गर्ने समसामयिक खाद्य समाधानहरू बजारमा ल्याइरहेको जनाएको छ।
यसैबीच, रिच्स इन्डिया, मध्यपूर्व र टर्कीका प्रबन्ध निर्देशक Pankaj Chaturvedi ले सहकार्य इनोभेसन, विशेषज्ञता र स्थानीय साझेदारीको संयोजनमार्फत नेपालको पाककला क्षेत्रलाई उचाइमा पुर्याउने साझा दृष्टिकोणमा आधारित रहेको बताए। उनले विश्वस्तरीय पाककला क्षमता र स्थानीय बजारको गहिरो बुझाइको समन्वयले नेपाली सेफ तथा फुडसर्भिस व्यवसायीलाई नयाँ अवसर प्रदान गर्ने विश्वास व्यक्त गरे।
यो विस्तारित सहकार्यले नेपालको पाककला तथा हस्पिटालिटी क्षेत्रमा नयाँ दिशा र उचाइ थप्ने अपेक्षा गरिएको छ। विश्वस्तरीय विशेषज्ञता र बलियो स्थानीय सञ्जालको संयोजनले गुणस्तरीय उत्पादन, प्राविधिक ज्ञान र उत्कृष्ट खाद्य अनुभव प्रदान गर्दै क्षेत्रीय विकासमा महत्वपूर्ण कोसेढुङ्गा सावित हुने विश्वास लिइएको छ।
