इटहरी : जेनजी आन्दोलनका क्रममा प्रहरीको नियन्त्रणबाट हराएका गोलीहरू सर्वसाधारणको घरमा भेटिएको छ।
आन्दोलनपछि हराएको तीन राउण्ड गोली इटहरी उपमहानगरपालिका–१० का एक स्थानीय नागरिकको घरबाट बरामद भएको हो।
प्रहरीले इटहरी–१० निवासी टीकाराम श्रेष्ठलाई नियन्त्रणमा लिएर अनुसन्धान अघि बढाएको छ। श्रेष्ठको घरबाट एसएलआर राइफलमा लाग्ने दुई राउण्ड र थ्रीनट–थ्री राइफलमा लाग्ने एक राउण्ड गोली फेला परेको हो।
बरामद गोली आन्दोलनकै क्रममा प्रहरीबाट लुटिएको प्रारम्भिक अनुसन्धानबाट खुलेको प्रहरीले जनाएको छ।
आन्दोलनका बेला प्रहरीको मोबाइल फोन चोरी भएको घटनाको अनुसन्धान गर्दै जाँदा श्रेष्ठको घरमा खानतलासी लिइएको थियो। त्यही क्रममा चोरी भएको मोबाइलसँगै गोली भेटिएपछि घटनाले नयाँ मोड लिएको प्रहरी स्रोत बताउँछ।
इलाका प्रहरी कार्यालय इटहरीका डीएसपी सुवास हमालका अनुसार पक्राउ परेका श्रेष्ठविरुद्ध हातहतियार तथा खरखजना सम्बन्धी मुद्दामा म्याद थप गरी अनुसन्धान भइरहेको छ।
“गोली कसरी निजी घरसम्म पुग्यो, यसमा संगठित गिरोह वा आन्दोलनकै भीडभित्रबाट योजनाबद्ध रूपमा लुटपाट भएको हो कि भन्ने सबै कोणबाट अनुसन्धान भइरहेको छ,” उनले भने।
यसैबीच, जेनजी आन्दोलनकै क्रममा इलाका प्रहरी कार्यालय इटहरीको हिरासतबाट फरार भएका ३५ जनामध्ये २२ जना पुनः नियन्त्रणमा आइसकेका छन्।
बाँकी फरार व्यक्तिको खोजी तीव्र पारिएको प्रहरीले जनाएको छ।
