रौतहट। आगामी फागुन २१ गते हुने प्रतिनिधिसभा सदस्य निर्वाचनको तयारीका लागि रौतहट जिल्लाका चारवटै निर्वाचन क्षेत्रमा शुक्रबार निर्वाचन अधिकृतको कार्यालय स्थापना गरिएको छ।
निर्वाचनलाई व्यवस्थित, निष्पक्ष र प्रभावकारी रूपमा सम्पन्न गर्ने उद्देश्यले जिल्लाका सबै निर्वाचन क्षेत्रमा कार्यालय सञ्चालनमा ल्याइएको हो।
जिल्ला निर्वाचन कार्यालयका प्रमुख छोटेलाल दासका अनुसार निर्वाचन क्षेत्र नम्बर १ का लागि गौर स्थित आन्तरिक करदाता सेवा कार्यालयमा कार्यालय स्थापना गरिएको छ।
यहाँ जिल्ला न्यायाधीश मनोज केसीलाई मुख्य निर्वाचन अधिकृतको जिम्मेवारी दिइएको उनले जानकारी दिए।निर्वाचन क्षेत्र नम्बर २ का लागि परोहा नगरपालिकास्थित कृषि, पशु तथा पन्छी सेवा केन्द्रमा कार्यालय सञ्चालनमा ल्याइएको हो।
जहाँ निर्वाचन अधिकृतका रूपमा इजलास अधिकृत सिताराम खड्का खटिएको उनले बताए। निर्वाचन क्षेत्र नम्बर ३ का लागि कटहरिया नगरपालिकाको कार्यालयमा स्थापना गरिएको छ।
यहाँ उपसचिव अवध किशोर प्रसाद कुशवाहले निर्वाचन अधिकृतको जिम्मेवारी सम्हालेको उनले जानकारी दिए। निर्वाचन क्षेत्र नम्बर ४ का लागि चन्द्रपुर नगरपालिका–५ मा निर्वाचन अधिकृतको कार्यालय स्थापना गरिएको छ। जहाँ निर्वाचन अधिकृतका रूपमा उपरजिस्ट्रार उद्धव ढोडारी खटिएको उनले बताए।
जिल्ला निर्वाचन कार्यालयका प्रमुख दासले कार्यालय स्थापनासँगै अब उम्मेदवारी दर्ता, मतदाता शिक्षा र मतदान केन्द्रहरूको अन्तिम व्यवस्थापन जस्ता कार्यहरूले गति लिने जानकारी दिए।
निर्वाचनको सुरक्षा संवेदनशीलतालाई मध्यनजर गर्दै जिल्ला प्रशासन कार्यालयले सुरक्षा निकायहरूसँग समन्वय गरी विशेष सुरक्षा योजना समेत तर्जुमा गरिरहेको छ।
मतदाताहरूले निर्धक्क भएर मताधिकार प्रयोग गर्न सकून् भन्ने उद्देश्यले गाउँ–गाउँमा सचेतना अभियान समेत चलाइने बताइएको छ। कार्यालय स्थापनासँगै जिल्लामा चुनावी चहलपहल समेत बढेको छ।
