– कमल भट्टराई
ताप्लेजुङस्थित पाथीभरा क्षेत्र धार्मिक तथा पर्यटकीय दृष्टिले अत्यन्तै महत्वपूर्ण मानिन्छ । नेपाल र भारतका विशेष गरी हिन्दू धर्मावलम्बीहरू साथै किराँत र बौद्ध धर्मावलम्बीहरुसमेत पाथीभराको दर्शन तथा पूजाआजा गर्न पुग्ने गरेका छन् ।
२०४५/०५० सालसम्म तीर्थयात्रीको संख्या निकै कम हुन्थ्यो । तर ताप्लेजुङमा यातायात सुविधामा सुधार आएसँगै तीर्थालुको संख्या क्रमशः बढ्दै गएको पाइन्छ ।
२०६७/०६८ सालमा ताप्लेजुङको सुकेटारसम्म कालोपत्रे सडक र भालुगौंडे–काफ्लेपाटी खण्डमा कच्ची सडक निर्माण भएपछि भालुगौंडे, काफ्लेपाटी, ठूलोफेदी क्षेत्रमा होटल तथा आवास सुविधासमेत विस्तार भयो । ती सुविधाका कारण तीर्थयात्रीको चाप उल्लेख्य रूपमा बढेको स्थानीयको बुझाई छ ।
पाथीभरा क्षेत्र विकास समितिका कार्यकारी निर्देशक प्रजिन हाङ्वाङका अनुसार सुविधाहरू विस्तार भइरहेसँगै दर्शनार्थीको संख्या पनि बढ्दो छ । “हामीले अझै धेरै पूर्वाधार र सेवा सुविधामा सुधार ल्याउन सकेमा तीर्थयात्रीको आगमन अझ बढ्न सक्छ,” हाङ्वाङ भन्छन् ।
गत अघिल्लो आर्थिक वर्ष २०८०/०८१ मा दुई लाख ३१ हजार ३३४ तीर्थयात्रीले पाथीभरा मन्दिरको दर्शन गरेका थिए । त्यस अवधिमा तीन करोड ९८ लाख ४१ हजार ९५८ रुपैयाँ बराबरको भेटीपाती सङ्कलन भएको क्षेत्र विकास समितिले जनाएको छ ।
त्यस्तै, गत आर्थिक वर्ष २०८१/०८२ मा दुई लाख १७ हजार ८७६ जना तीर्थयात्रीले दर्शन गर्दा तीन करोड ११ लाख ६४ हजार ६७६ रुपैयाँ बराबरको भेटीपाती सङ्कलन भएको समितिको भनाइ छ ।
