पथरी शनिश्चरे, मंसिर १४
मोरङको पथरीशनिश्चरेस्थित वाल्मीकि माध्यमिक विद्यालयमा स्थापित वाल्मीकि स्काउट दलको दीक्षान्त समारोह भव्य रूपमा सम्पन्न भएको छ। स्काउट दलका ३२ जना विद्यार्थीहरू दीक्षित भएका छन्।
कार्यक्रमका प्रमुख अतिथि पथरीशनिश्चरे–२ का वडा अध्यक्ष नैना राई रहनुभयो। सो अवसरमा विद्यालयका निर्देशक नोवल किशोर खनाल, नेपाल स्काउट पथरी शनिश्चरे नगरपालिकाका प्रमुख आयुक्त रोशन बुढाथोकी, विद्यालयका प्रिन्सिपल चन्द्र प्रसाद दुलाल लगायतको उपस्थिति रहेको थियो।
समारोहलाई सम्बोधन गर्दै प्रमुख अतिथि तथा अतिथिहरूले स्काउट जस्ता कार्यक्रमले विद्यार्थीको चौतर्फी विकास, नेतृत्व क्षमता तथा अनुशासन अभिवृद्धिमा महत्वपूर्ण भूमिका खेल्ने उल्लेख गरे।
दीक्षान्तकै अवसरमा साँझ विद्यालय प्राङ्गणमा क्याम्प–फायर, विभिन्न मनोरञ्जनात्मक प्रस्तुति, साथै ओमेगा, जिप–लाइन, अप्सिलिङ लगायतका साहसिक गतिविधिहरू सम्पन्न गराइएको विद्यालयले जनाएको छ।
कार्यक्रमको अन्त्यमा दीक्षित विद्यार्थीहरूलाई प्रमाणपत्र, ब्याज र स्कार्फ प्रदान गरिएको वाल्मीकि स्काउट दलले जानकारी दिएको छ।
