कृष्ण पोखरेल, विराटनगर — कोशी प्रदेश सरकारअन्तर्गत रहेको मनमोहन प्राविधिक विश्वविद्यालयका विद्यार्थीहरूले कृषि र स्मार्ट सिटी विकासमा उपयोगी हुने नवीन प्राविधिक उपकरणहरू निर्माण गरेका छन्।
विश्वविद्यालयको आंगिक शिक्षालय मनमोहन पोलिटेक्निकमा तीन वर्षे डिप्लोमाको अन्तिम वर्षमा अध्ययनरत विद्यार्थीहरूले आइतबार आफ्नो परियोजनाका उपकरणहरूको सार्वजनिक प्रदर्शन गरे।
इलेक्ट्रिकल इन्जिनियरिङतर्फका विद्यार्थीहरूले तयार पारेको “स्मार्ट फार्मिङ मेसिन” एकै उपकरणबाट धान काट्ने, दाइ गर्ने, मल र पानी छर्ने तथा जोत्नेजस्ता विभिन्न कृषि कार्यहरू गर्न सक्ने बहुउपयोगी मेसिन हो। उनीहरूले उक्त मेसिनको रिमोटबाटै सञ्चालन गरेर प्रदर्शनसमेत गरे।
त्यसैगरी, इलेक्ट्रिकल एन्ड इलेक्ट्रोनिक्स इन्जिनियरिङ विभागका विद्यार्थीहरूले स्मार्ट सिटी अवधारणालाई लक्षित गर्दै सोलार ऊर्जाबाट चल्ने पोडवे सिस्टम तयार पारेका छन्। आइतबार उनीहरूले पनि सोलार पोडवेको कार्यप्रणालीको डेमो प्रदर्शन गरे। सोही समूहले बिषादी छर्ने मेसिन समेत निर्माण गरेको छ।
सिभिल इन्जिनियरिङ विभागका विद्यार्थीहरूले भूकम्प प्रतिरोधी पुरानो शैलीका घर, आधुनिक धर्मशाला र व्यापारिक मललगायत सातवटा मोडल प्रदर्शन गरे।
आईटी विभागका विद्यार्थीहरूले अनुहार पहिचान आधारित इ-हाजिरी सिस्टम, स्मार्ट अलर्ट सिस्टम, स्मार्ट रोबोट र स्मार्ट तालालगायत छवटा नयाँ प्रणाली प्रस्तुत गरे।
मेकानिकल इन्जिनियरिङ विभागका विद्यार्थीहरूले घुमफिर गर्न सक्ने होचो अनलोड वोगी कार, अटोमेटिक वासिङ मेसिन र अटोमेटिक राइस प्लान्टर लगायतका उपकरणहरू प्रदर्शन गरेका थिए।
मनमोहन पोलिटेक्निकका विद्यार्थीहरूले हरेक वर्ष आफ्नो अध्ययन अवधिभर सिकेका सीप र ज्ञानका आधारमा तयार पारेका उपकरण र प्रविधिहरूको सार्वजनिक प्रदर्शन गर्दै आएका छन्। यस वर्षका प्रदर्शनले विद्यार्थीहरूको सिर्जनशीलता र व्यावहारिक दक्षताको उत्कृष्ट झल्को दिएको छ।
