विराटनगर / नेपाल सम्वत ११४६ को शुभारम्भको अवसरमा विराटनगर महानगरपालिकाका मेयर नागेश कोइरालाले सम्पूर्ण नगरवासीहरू तथा स्वदेश–विदेशमा रहेका नेपालीहरूलाई सुख, शान्ति, समृद्धि र दीर्घायुको शुभकामना व्यक्त गरेका छन् ।
मेयर कोइरालाले शुभकामना सन्देशमार्फत नेपाल सम्वतलाई नेपालको मौलिक राष्ट्रिय पात्रोका रूपमा चिनाउँदै यसले नेपाली स्वाभिमान, सांस्कृतिक विविधता र ऐतिहासिक चेतनालाई अभिव्यक्त गर्ने उल्लेख गरे। उनका अनुसार यो सम्वत केवल पात्रो मात्र नभई सहिष्णुता, सामाजिक एकता र साझा नेपाली पहिचानको प्रतीक पनि हो ।
‘नेपाल सम्वत हाम्रो सभ्यता, राष्ट्रियता र पहिचानको मेरुदण्ड हो,’ मेयर कोइरालाले भने, ‘यसलाई संरक्षण र सम्मान गर्नु हाम्रो साझा दायित्व हो।’
वर्तमानमा महानगर समावेशी विकास, सुशासन, सामाजिक न्याय र समृद्ध नगर निर्माणतर्फ अघि बढिरहेको उल्लेख गर्दै उनले यस्ता पवित्र पर्वहरूले नागरिकलाई अझ जिम्मेवार, प्रतिबद्ध र सेवा–मुखी बनाउने विश्वास व्यक्त गरे ।
सन्देशको अन्त्यमा मेयर कोइरालाले नेपाल सम्वत ११४६ ले सम्पूर्ण नेपालीमा नवीन ऊर्जा, सहकार्य र राष्ट्र निर्माणको मार्गमा अघि बढ्ने प्रेरणा जगाओस् भन्ने शुभेच्छा व्यक्त गरेका छन् ।
‘फेरि एकपटक, यो ऐतिहासिक पर्वको अवसरमा सम्पूर्ण महानगरवासी र नेपाली दाजुभाइ–दिदीबहिनीहरूमा सुस्वास्थ्य, शान्ति र समृद्धिको हार्दिक शुभकामना व्यक्त गर्दछु,’ उनले भने ।
