काठमाडौं। नेपाली यू–१९ महिला क्रिकेट टोलीले चीनमा सम्पन्न बेल्ट एन्ड रोड सिरिजको उपाधि जितेको छ। आइतबार हङकङसँगको अन्तिम खेल वर्षाका कारण पूरा हुन नसकेपछि नेपालले अपराजित रहँदै प्रतियोगिताको उपाधि जितेकाे हाेे।
६ टोलीको सहभागिता रहेको प्रतियोगितामा नेपालले खेलेका ६ मध्ये चार खेलमा जित हासिल गर्याे। बाँकी दुई खेल वर्षाका कारण रद्द भएका थिए।
नेपालले सिरिजको पहिलो खेलमा थाइल्यान्डलाई सात विकेटले हराउँदै सुखद सुरुआत गरेको थियो। त्यसपछि चीनसँगको दोस्रो खेल वर्षाले प्रभावित भएपछि नतिजाविहीन बनेको थियो।
तेस्रो खेलमा नेपालले हङकङलाई ९२ रनको फराकिलो अन्तरले पराजित गरेको थियो। नेपालले चौथो खेलमा पुनः थाइल्यान्डमाथि ५२ रनको जित निकालेको थियो। नेपालले पाँचौँ खेलमा आयोजक चीनलाई ८४ रनले हराउँदै उपाधि यात्रालाई थप बलियो बनाएको थियो।
नेपालले अन्तिम खेलमा हङकङसँग प्रतिस्पर्धा गरेको थियो। उक्त खेलमा पहिले ब्याटिङ गरेको नेपालले वर्षाले खेल रोकिनुअघि ११ ओभरमा दुई विकेटको क्षतिमा ८८ रन बनाएको थियो।
त्यसपछि मौसम प्रतिकूल बनेपछि खेल पुनः सञ्चालन हुन सकेन। प्रतियोगितामा नेपाल, आयोजक चीन, हङकङ र थाइल्यान्ड गरी चार टोली सहभागी थिए।– रासस
