सुनसरी । दसैँमा मान्यजनबाट टीका र आशीर्वाद थाप्न घर जाने यात्रुले एसियाली राजमार्गअन्तर्गत काँकडभिट्टा–लौकही सडकखण्डमा धुलो, खाल्डाखुल्डी र अव्यवस्थित सडकका कारण सास्ती खेप्नुपरेको छ। मोरङ र सुनसरी खण्डमा सडक निर्माणले अपेक्षित गति लिन नसक्दा चाडपर्वको समयमा यात्रुहरूको आवागमनसमेत कष्टकर बनेको हो।
निर्माणाधीन सडकका विभिन्न स्थानमा रहेका खाल्डाखुल्डी, अस्थायी वैकल्पिक मार्ग र कजवेका कारण सवारीसाधन सञ्चालनमा कठिनाइ भइरहेको छ। सडकको अवस्था कमजोर हुँदा सवारीचालकले खाल्डाखुल्डी छल्दै यात्रा गर्नुपर्ने बाध्यता रहेको छ।
विशेषगरी मोटरसाइकलमा यात्रा गर्नेहरू धुलोको मुस्लो र बिग्रिएको सडकका कारण बढी प्रभावित भएका छन्। सडकबाट उड्ने धुलो तथा सवारीसाधनबाट निस्कने धुवाँले यात्रुहरूलाई थप असहज बनाएको छ।
दसैँको अवसरमा परिवारसँग भेटघाट गर्न र मान्यजनको हातबाट टीका लगाउन घर फर्कने यात्रुले सहज यात्राको अपेक्षा गरे पनि निर्माणाधीन सडकको अवस्थाले उनीहरूको यात्रामा कठिनाइ थपेको छ।
चाडपर्वका बेला सवारी आवागमन बढ्ने भए पनि सडक निर्माणाधीन क्षेत्रमा सहज र सुरक्षित यात्राका लागि आवश्यक व्यवस्थापन प्रभावकारी हुन नसक्दा यात्रुहरूले बाटोमै सास्ती बेहोर्नुपरेको छ।
