तेह्रथुम : तेह्रथुमको छथर गाउँपालिकाले सञ्चालन गरेको जेष्ठ नागरिक लक्षित घरदैलो स्वास्थ्य सेवा अभियान अन्तर्गत ७ सय ६८ जना जेष्ठ नागरिकले स्वास्थ्य सेवा प्राप्त गरेका छन । गाउँपालिकाले सञ्चालन गरेको ‘जेष्ठ नागरिक घरदैलो स्वास्थ्य उपचार तथा गाउँपालिका साथी–लौरो उपहार कार्यक्रम’ अन्तर्गत गाउँ–गाउँमा पुगेर स्वास्थ्य परीक्षण, औषधि वितरण तथा लौरो उपहार प्रदान गरिएको हो ।
गाउँपालिकाका अनुसार ९ वटा स्वास्थ्यकर्मीको टोली परिचालन गरी जेष्ठ नागरिकको घरघरमा पुगेर सेवा प्रदान गरिएको छ। स्वास्थ्यकर्मी, जनप्रतिनिधि तथा स्वयंसेवक सम्मिलित टोलीले जेष्ठ नागरिकको स्वास्थ्य अवस्था परीक्षण गर्नुका साथै आवश्यक परामर्श र औषधिसमेत उपलब्ध गराएको छ ।
दुर्गम बस्तीका धेरै जेष्ठ नागरिक आर्थिक रूपमा विपन्न हुनु, स्वास्थ्य संस्थासम्म पुग्न लामो दूरी तय गर्नुपर्ने बाध्यता रहनु तथा सहज यातायातको अभावका कारण नियमित स्वास्थ्य सेवाबाट वञ्चित हुँदै आएका छन्। यिनै समस्यालाई मध्यनजर गर्दै गाउँपालिकाले घरमै पुगेर स्वास्थ्य सेवा प्रदान गर्ने अभियान सञ्चालन गरेको हो ।
गाउँपालिका अध्यक्ष सन्तवीर लिम्बूले जेष्ठ नागरिकलाई सम्मानपूर्वक स्वास्थ्य सेवा उपलब्ध गराउने उद्देश्यले कार्यक्रम सञ्चालन गरिएको बताए । उनका अनुसार गाउँपालिकाले निःशुल्क एम्बुलेन्स सेवासहित जेष्ठ नागरिक लक्षित विभिन्न कार्यक्रम सञ्चालन गर्दै आएको छ । स्वास्थ्य शाखा प्रमुख गिरीराज खड्काले गाउँपालिकाभित्र रहेका जेष्ठ नागरिकलाई घरमै पुगेर स्वास्थ्य सेवा प्रदान गरिएको जानकारी दिए । अध्यक्ष, वडाध्यक्ष, कार्यपालिका सदस्य, वडा सदस्य तथा स्वास्थ्यकर्मीहरूको सहभागितामा अभियान सञ्चालन गरिएको उनले बताए ।
कार्यक्रमबाट लाभान्वित छथर गाउँपालिका–२ का जेष्ठ नागरिक भक्तबहादुर लिम्बूले घरमै स्वास्थ्य सेवा प्राप्त गर्दा निकै सहज भएको बताए । गाउँपालिकाले सञ्चालन गरेको कार्यक्रमले वृद्धवृद्धालाई ठूलो राहत पुगेको लिम्बुको भनाई छ । असार ६ गतेदेखि सुरु भएको अभियान असार १२ गते सम्पन्न भएको गाउँपालिकाले जनाएको छ । अभियानमार्फत गाउँपालिकाभित्रका जेष्ठ नागरिकको स्वास्थ्य अवस्था परीक्षण, आवश्यक औषधि वितरण तथा सम्मानस्वरूप लौरो उपहार प्रदान गरिएको थियो ।
