काठमाडौं, ०३ असार । जलविद्युत् क्षेत्रको कम्पनी माउन्ट एभरेष्ट पावर डेभलपमेन्ट लिमिटेडले सर्वसाधारणका लागि प्राथमिक शेयर (आईपीओ) बिक्री खुला गरेको छ। लगानीकर्ताले आजदेखि न्यूनतम १० कित्तादेखि अधिकतम १० हजार कित्तासम्मका लागि आवेदन दिन सक्नेछन्।
माउन्ट एभरेष्ट पावर डेभलपमेन्ट लिमिटेडले असार ३ गतेदेखि सर्वसाधारणका लागि आईपीओ निष्काशन तथा बिक्री प्रक्रिया सुरु गरेको छ। कम्पनीले प्रतिकित्ता १०० रुपैयाँ अंकित दरमा कुल १४ लाख २७ हजार ६०० कित्ता शेयर सार्वजनिक निष्काशनमा ल्याएको हो, जसको कुल मूल्य १४ करोड २७ लाख ६० हजार रुपैयाँ बराबर रहेको छ।
कम्पनीका अनुसार इच्छुक लगानीकर्ताले न्यूनतम १० कित्ता र अधिकतम १० हजार कित्तासम्मका लागि आवेदन दिन सक्नेछन्। बिक्री अवधि छिटोमा असार ८ गतेसम्म रहनेछ भने मागअनुसार पूर्ण आवेदन नपरेमा असार १७ गतेसम्म खुला रहने व्यवस्था गरिएको छ।
माउन्ट एभरेष्ट पावरले सोलुखुम्बु क्षेत्रमा १२ मेगावाट क्षमताको दुधकुण्ड खोला जलविद्युत् आयोजना सञ्चालन गरिरहेको छ। आयोजनाको कुल लागत करिब २ अर्ब ३६ करोड ९३ लाख रुपैयाँ रहेको कम्पनीले जनाएको छ। प्रतिमेगावाट लागत करिब १९ करोड ७४ लाख रुपैयाँ रहेको उक्त आयोजनाको विद्युत् उत्पादन अनुमतिपत्रको अवधि अझै २८ वर्ष ९ महिना बाँकी छ।
कम्पनीका अनुसार आयोजनामा गरिएको लगानी सामान्य आधारमा ६.४० वर्षभित्र फिर्ता हुने अनुमान गरिएको छ भने डिस्काउन्टेड आधारमा लगानी फिर्ता अवधि ८.९४ वर्ष रहेको छ। आईपीओ निष्काशन तथा बिक्री व्यवस्थापनको जिम्मेवारी एनआईएमबि एस क्यापिटल लिमिटेडले सम्हालेको छ।
