काठमाडौँ- गृहमन्त्री सुधन गुरुङले माइतीघर मण्डलामा विभिन्न मुद्दा र माग लिएर धर्ना बसिरहेका पीडितहरूलाई संयुक्त रूपमा भेटेर उनीहरूको समस्यालाई सम्बोधन गर्ने प्रतिबद्धता जनाएका छन्।
मंगलबार दोस्रोपटक गृहमन्त्रीको जिम्मेवारी सम्हालेका गुरुङले माइतीघरमा विभिन्न विषयमा न्याय र सुनुवाइको माग गर्दै आन्दोलनरत पीडित पक्षसँग छलफल गरी उनीहरूका माग सम्बोधनका लागि पहल गर्ने बताएका हुन्।
गृहमन्त्रीको पदभार ग्रहण गर्दै उनले अपराध अनुसन्धानसँग सम्बन्धित सबै फाइल खोल्ने र कानुनी प्रक्रियाअनुसार निष्पक्ष छानबिन अघि बढाउने प्रतिबद्धता पनि व्यक्त गरेका थिए।
उनले नागरिकका गुनासा, पीडा र न्यायको मागप्रति सरकार संवेदनशील रहेको बताए।
