तेह्रथुम । तेह्रथुम जिल्लाको आठराई गाउँपालिका–३ ह्वाकू ठुटेवर नजिकै घर भित्रै एक महिलाको शंकास्पद मृत्यु भएको छ । घटनामा हत्याको आशंकामा श्रीमानलाई प्रहरीले नियन्त्रणमा लिएको छ ।
मंगलबार बिहान स्थानीयवासीले ३३ वर्षीया आइतरानी दास घर भित्रै मृत अवस्थामा फेला पारेपछि प्रहरीलाई खबर गरेका थिए ।
इलाका प्रहरी कार्यालय सक्रान्ति बजारका प्रहरी निरिक्षक बिबेक बस्नेतको कमान्डमा खटिएको टोलीले घटना स्थलमा पुगि हत्याको आशंखामा ५० वर्षिय मृतकका श्रीमान पूर्ण बहादुर दासलाई पक्राउ गरी अनुसन्धान सुरू गरेको छ ।
सोमबार राति घरभित्रै कुटपिटका कारण उनको मृत्यु भएको हुन सक्ने आशंका गरिएको छ । मृतकको शरीरभरि निलडाम देखिएकोले दाउरा जस्ता वस्तु प्रयोग गरी कुटपिट गरिएको हुन सक्ने अनुमान गरिएको छ।
घटनापछि प्रमाण लुकाउन रगत सफा गर्ने, मृतकको लुगा फेर्ने जस्ता प्रयास गरिएको देखिएको छ, जसले घटनालाई थप शंकास्पद बनाएको छ ।मृतकका डेढ वर्षकी एक छोरी रहेको बताइएको छ ।प्रहरीले यस घटनालाई “हत्या भएको आशंका”का आधारमा अनुसन्धान गरिरहेको छ भने विस्तृत विवरण आउन बाँकी रहेको छ ।
