विराटनगर । अनौपचारिक क्षेत्र सेवा केन्द्र (इन्सेक) कोशी प्रदेश कार्यालय, विराटनगर र बूढीगंगा गाउँपालिकाको आयोजनामा अन्तरक्रियात्मक प्रशिक्षण कार्यक्रम सम्पन्न भएको छ ।
‘मर्यादा समानता मानव अधिकारका लागि मर्यादित महिनावारी’ सन्देशसहित सातौँ अन्तर्राष्ट्रिय मर्यादित महिनावारी दिवसका अवसरमा मर्यादित महिनावारी मानव अधिकारको आधार भएकाले सबैखाले भेदभावको अन्तको आव्हान गर्दै कार्यक्रम गरिएको हो ।
महिला अधिकार, किशोरी शिक्षा, अन्तरपुस्तागत न्याय विषयमा आयोजित अन्तरक्रियात्मक प्रशिक्षण कार्यक्रममा इन्सेक कोशी प्रदेश कार्यालयका संयोजक मनोहर पोखरेल र मानव अधिकार रक्षक सञ्जालका संयोजक देवी बाँस्कोटाले सहजीकरण गरे।
यौन र लैङ्गिक हिंसाको रूपमा हुने भेदभावलाई व्याख्या गर्दै इन्सेक कोशी प्रदेश संयोजक मनोहर पोखरेलले विज्ञानले स्वीकार गरी परिभाषित गरेको महिनावारी जीवनको प्राकृतिक तथ्य र सृष्टिको कारक भएकोले मासिक रूपमा हुने महिनावारी चक्रलाई सम्मानजनक र स्वस्थ तरिकाले बुझ्नु पर्ने र व्यवस्थापन गर्नुपर्ने बताए ।
मानव अधिकार रक्षक सञ्जालका संयोजक बाँस्कोटाले लैङ्गिक विभेद र कानूनी शासनको चर्चा गर्दै बालविवाह, दाईजोप्रथा, बहुविवाह, जातीय भेदभाव, भ्रुण हत्यालगायत हिंसाको शिकारबाट समाजको विकास अवरुद्ध भएकोले सजग र सुरक्षित समाज निर्माणका लागि जिम्मेवार बन्न आग्रह गरे ।
कार्यक्रमको उद्घाटन गर्दै बूढीगंगा गाउँपालिकाकी उपाध्यक्ष अमृता कुमारी गच्छदारले हिंसा न्यूनीकरणका लागि गाउँपालिकाले विभिन्न कार्यक्रमहरू ल्याएको बताउँदै महिलाहरूले हिंसाविरूद्ध आवाज उठाउने साहस देखाउन र आफू तथा अन्यको सुरक्षामा योगदान पु¥याउन अपील गरे ।
