ताप्लेजुङः हिजो राति ताप्लेजुङको मिक्वाखोला गाउँपालिका–४ स्थित तेम्बा बजारमा लागेको भीषण आगलागीले चार घर पूर्ण रूपमा जलेर नष्ट भएका छन् ।
राति करिब ११ बजे शुरु भएको आगो स्थानीय बासिन्दा, नेपाली सेना र नेपाल प्रहरीको संयुक्त प्रयासमा आज बिहान करिब ६ बजे नियन्त्रणमा आएको हो ।
इन्द्रकुमार लिम्बू, राजकुमार लिम्बू, अनिल लिम्बू र विष्णुप्रसाद लिम्बूका घर पूर्ण रूपमा जलेका छन् ।
इन्द्रकुमार लिम्बूको ढुङ्गामाटो र काठको बेरा रहेको तीन तले घर जलेर पूर्ण रूपमा नष्ट भएको छ । घरमा रहेको अन्नपात, भाँडाकुँडा, लत्ताकपडा, काठपात, घरायसी सामग्रीदेखि सुन दुई तोला, नगद दुई लाख रुपैयाँ, किराना सामान सबै खरानी बनेका छन्। सोही घरमा भाडामा बस्ने दोर्ची शेर्पाका २५ मन अलैंची र १० कुखुरा जलेर नष्ट भएका छन् ।
स्थानीयका अनुसार राजकुमार लिम्बूको तीन तले घर पूर्ण रूपमा जलेको छ । घरभित्र रहेका अन्नपात, भाँडाकुँडा, लत्ताकपडा, चार तोला सुन, १५ तोला चाँदी, नगद दुई लाख रुपैयाँ, किराना सामग्री, १२ वटा कुखुरा जलेका छन् । घरअगाडि पार्किङ गरिएको मे १० प ८२४६ नम्बरको पल्सर मोटरसाइकल पनि जलेर नष्ट भएको छ ।
अनिल लिम्बूको घरमा रहेका अन्नपात, भाँडाकुँडा, लत्ताकपडा, सुन दुई तोला, चाँदी एक तोला, नगद तीन लाख रुपैयाँ र किराना सामान तथा २२ कुखुरा जलेर नष्ट भएका छन् ।
विष्णुप्रसाद लिम्बूको ढुङ्गामाटो र काठको बेरा भएको एक तले घर पूर्ण रूपमा जलेको छ । घरभित्रका अन्नपात, भाँडाकुँडा, लत्ताकपडा र नगद एक लाख रुपैयाँसहित किराना सामग्री जलेका छन् । घरअगाडि पार्किङ गरिएका मे १ ज ३००३ महेन्द्र म्याक्स र ग ३ च ९८४७ बोलेरो गाडीको बाहिरी भागमा केही क्षति पुगेको प्रहरीले जनाएको छ ।
नेपाली सेनाको वीरदल गणबाट खटिएको टोली, सहायक सेनानी टेकबहादुर साउदको कमान्डमा रहेको सुरक्षा पोस्टबाट परिचालित समूह तथा प्रहरी चौकी साँवाका प्रहरी नायब निरीक्षक ख्यामबहादुर श्रेष्ठको टोली र स्थानीयवासीको सहयोगमा आगो नियन्त्रणमा आएको थियो ।
