काठमाडौं । राष्ट्रिय कर दिवस–२०८२ का अवसरमा वस्तु व्यापारको कारोबार गर्नेतर्फ सर्वाधिक कर बुझाउने करदाताका रूपमा भाटभटेनी सुपर मार्केट एन्ड डिपार्टमेन्टल स्टोर प्रालि सम्मानित भएको छ ।
आन्तरिक राजस्व विभागले आज आयोजना गरेको कार्यक्रममा अर्थमन्त्री रामेश्वर खनालले भाटभटेनीका अध्यक्ष तथा प्रबन्ध निर्देशक मीनबहादुर गुरुङलाई सम्मानपत्र हस्तान्तरण गरे ।
सो अवसरमा अध्यक्ष गुरुङले कर तिरेपछिको रकम दान दिन खोज्ने आफ्नो चाहना रहेको बताए । दान दिएकै कारण जेनजी आन्दोलनमा भाटभटेनीमा आक्रमण भएको उनको भनाइ थियो ।
कुनै पार्टीलाई भवन बनाइदिने भन्दा जेनजी आन्दोलनमा भाटभटेनी सुपरस्टोरका आउटलेटहरूमा तोडफोड, आगजनी र लुटपाट भएको उनले बताए ।
कर दिवसमा भाटभटेनी सम्मानित भएपछि अध्यक्ष मीनबहादुर गुरुङको वक्तव्य
गत भाद्र २३ र २४ गते जेनजी ठूलो आन्दोलन भयो । पहिला पहिला १५ देखि २० वर्ष लाग्थ्यो । अहिले जेनजीले २ दिनमै सत्ता उलटपुलट गरिदिए । यसमा हामी सबै अलि गम्भीर हुनुपर्छ । हामी गम्भीर भएनौँ भने अर्को आन्दोलन हुन्छ, अर्को आन्दोलन भए न मेरो भाटभटेनी रहन्छ, न कसैको लगानी बाँकी रहन्छ ।
यो आन्दोलनमा घुसपैठ भएर होला, धेरै ठूलो क्षति भयो । दशैं, तिहार, छठ आउँदै गरेकाले ठूलो स्टक राखेका थियौं । यो दुःखद् घटनापछि पनि मैले अघि बढ्ने हिम्मत गरेको छु, म अघि बढ्छु, कारण के भने म मा जिम्मेवारी छ, बैंकको लगानी छ, मसँग आवद्ध हजारौँ भाइबहिनी हुनुहुन्छ, त्यो भन्दा ठूलो मेरो देश छ ।
हामी अलि विपन्न भएको कारणले नै यो विभिन्न समयमा आन्दोलन भइरहेको हो । आन्दोलन हुनुको पछि हामी जिम्मेवार नहुनु पनि होला । हामी जिम्मेवार भएर देश विकासमा लाग्नुपर्छ । हाम्रो घर कमजोर भयो भने वल्लो घर, पल्लो घरकाले आएर राज गर्न थाल्छन् । जुन घटना भयो यो, १२ वटा भाटभटेनी सखाप नै भए ।
अरु धेरैमा लुटपाट भए । अब यस्तो घटना हुँदैन होला र सबैले बोध गर्छन् भन्ने विश्वास छ । भाटभटेनीमाथि किन आक्रमण भयो भन्दा कुनै पार्टीलाई भवन बनाइदिने भयो भनेर रे । भाटभटेनीको मूल आफ्नो ट्याक्स पे गरिसकेपछिको पैसा उसले दान गर्न चाहन्छ, त्यही भएर डा. भगवान कोइरालाको नेतृत्वमा बनेको बाल अस्पताल हामीले यही मंसिरमा उद्घाटन गरेर बालबालिका राख्ने सोचमा थियौँ, आन्दोलनले केही ढिला भयो ।
नेपालमा करोडौं दिनेकुरा नौलो कुरा हो । विभिन्न जिल्लाका विपन्न व्यक्तिहरूका बालबालिकालाई मैले एमबीबीएस पढाएको छु । टिचिङ अस्पतालमा पनि राम्रै सहयोग गरेका छौं । भवन बनाइदिएका छौं । अहिले पार्टीलाई भवन बनाइदियो भन्ने छ । मेरो आफ्नो पर्सनल कुरा हो । सबै पार्टीलाई तपाईंहरू सुध्रिनुस्, हामी सहयोग गर्छौं भनेको छु । मूल कुरा पार्टी जस्तो लागेको थियो, अहिले अब जेनजी रहेछ । १० जनासँग किन माग्नु म एक्लैले दिइहाल्छु नि भनेर दिएको हो । त्यसका खातिर यो भोग्नुपर्यो । मैले उहाँहरूसँग लिने होइन, दिने मात्रै हो ।
