विराटनगर (मोरङ) – सामुदायिक प्रहरी सेवा केन्द्र, तिनपैनी चोक, विराटनगर–२ ले स्थानीय समुदायलाई लक्षित गर्दै प्रत्येक शनिबार बिहान ७ देखि ९ बजेसम्म निःशुल्क स्वास्थ्य परीक्षण कार्यक्रम सुरु गरेको छ।
“स्वस्थ समाज, सुरक्षित समाज” भन्ने उद्देश्यसहित सुरु गरिएको उक्त कार्यक्रममा उच्च रक्तचाप, मधुमेह (सुगर), पल्स रेट, अक्सिजन स्तर (Oximeter) तथा तौल मापनजस्ता आधारभूत स्वास्थ्य परीक्षण सेवा निःशुल्क रूपमा उपलब्ध गराइनेछ।
कार्यक्रम अटल क्लिनिक एण्ड पाथ ल्याब प्रा. लि., जलजला चौक, विराटनगर–७ को प्राविधिक सहयोग र समाजसेवी पवन अटलको सौजन्यमा सञ्चालन गरिएको हो। सामुदायिक प्रहरी सेवा केन्द्रका सल्लाहकार तथा समाजसेवी चम्पालाल राठी र पवन अटलको पहलमा सुरु गरिएको यो अभियानले स्थानीय बासिन्दामा स्वास्थ्य सचेतना अभिवृद्धि गर्ने लक्ष्य लिएको छ।
कार्यक्रमको संयोजन केन्द्रका कोषाध्यक्ष सन्तोष बाहेती (माइकल) ले गर्नुभएको थियो भने सह–संयोजन सह–सचिव हिरा बहादुर थापा मगर र कानुनी सल्लाहकार अधिवक्ता सुनिल कर्णले गर्नुभएको थियो। स्वागत मन्तव्य केन्द्रका उपाध्यक्ष विद्यानन्द माझीले प्रस्तुत गर्नुभएको थियो।
कार्यक्रमका प्रमुख अतिथि मोरङ जिल्ला प्रहरी प्रमुख प्रहरी उपरीक्षक (SP) कबित कटुवाल रहनुभएको थियो। उहाँले स्वास्थ्य अभियानका प्रमुख सहयोगी समाजसेवी चम्पालाल राठी र पवन अटललाई सम्मान गर्नुभएको थियो। SP कटुवालले सामुदायिक प्रहरीको पहलमा आत्महत्या नियन्त्रण, लागुऔषध दुरुपयोग न्यूनीकरण र सामाजिक अपराध नियन्त्रणजस्ता सचेतनामूलक कार्यक्रम निरन्तर सञ्चालन गरिने बताउनुभयो।
स्वास्थ्य परीक्षणका लागि पाँच सदस्यीय प्राविधिक टोलीले सेवा प्रदान गरेको थियो, जसको नेतृत्व अनुप अटलले गर्नुभएको थियो। कार्यक्रमको सहजीकरण पदेन सदस्य वरिष्ठ हवल्दार तारा अधिकारी र सहायक हवल्दार कल्पना कटेलले गर्नुभएको थियो भने सञ्चालन सचिव भोजराज घिमिरेले गर्नुभएको थियो।
कार्यक्रममा वडा नं. २ का अध्यक्ष कुमार पोखरेल, मोरङ जिल्ला प्रहरी कार्यालयकी प्रहरी नायब उपरीक्षक (DSP) कोपिला चुडाल, ट्राफिक प्रहरी प्रमुख प्रहरी निरीक्षक सन्तोष न्यौपाने, समाजसेवी मनोज बिक्रम शाह, मोरङ उद्योग संगठनका अध्यक्ष तथा केन्द्रका सल्लाहकार नन्दकिशोर राठी, कार्यकारी सदस्य पद्मा पौडेल, विजय शर्मा, सुशील मुद्रा लगायतको उपस्थिति थियो।
कार्यक्रमको अध्यक्षता सामुदायिक प्रहरी सेवा केन्द्रकी अध्यक्ष मिना जोशीले गर्नुभएको थियो। उहाँले सामुदायिक प्रहरी र स्थानीय निकायबीचको सहकार्यले समाजमा विश्वास, सहयोग र सकारात्मक सन्देश फैलाउने विश्वास व्यक्त गर्नुभयो।
सामुदायिक प्रहरी सेवा केन्द्रद्वारा सुरु गरिएको यो निःशुल्क स्वास्थ्य परीक्षण अभियानले प्रारम्भिक रोग पहिचान, स्वास्थ्य सचेतना वृद्धि र सुरक्षित समुदाय निर्माणमा योगदान पुर्याउने अपेक्षा गरिएको छ।
