दुहबी, कार्तिक २१ — दुहबी नगर आधारभूत अस्पतालमा आजदेखि आँखा र कानसम्बन्धी रोगको नियमित जाँच तथा उपचार सेवा सुरु गरिएको छ। बिराटनगर आँखा अस्पतालको प्राविधिक सहयोग र दुहबी नगरपालिकाको सहकार्यमा सेवा सञ्चालन थालिएको हो।
सेवाको औपचारिक शुभारम्भ दुहबी नगर प्रमुख वेद नारायण गच्छादारले रिबन काटी उद्घाटन गरेका छन्। बिराट आँखा अस्पताल व्यवस्थापन समिति अध्यक्ष पद्म नारायण चौधरी र नगर प्रमुख गच्छादारबीच गत कार्तिक २ गते सेवासञ्चालन सम्बन्धी सम्झौता भएको थियो।
नगर प्रमुख गच्छादारका अनुसार नगर अस्पतालमा हाल नवजात शिशुमा हुने पीलिया (जन्डिस) रोगको उपचार प्राविधिक रूपमा सम्भव बनेको छ। उनले आगामी पुस महिनाभित्र अस्पतालमा स्त्रीरोग (गाइनो) तथा हाड–जोर्नीसम्बन्धी थप सेवा विस्तार गरिने प्रतिबद्धता पनि व्यक्त गरे।
उनका अनुसार दुहबी नगरपालिकाले सन् २०७६/७७ देखि नै नगरवासीका लागि मोतियाबिन्दु, जलबिन्दु तथा आँखामा मासु पलाउने रोगको निःशुल्क उपचार गर्दै आएको छ। नगर अस्पताल सञ्चालनमा आएपछि आफ्नै अस्पतालमार्फत थप सेवा विस्तार गर्ने उद्देश्यले आजदेखि नयाँ कार्यक्रम सुरु गरिएको उनले बताए।
स्वास्थ्य क्षेत्रमा ‘देशकै उत्कृष्ठ नगरपालिका’को सम्मान सभामुख देवराज घिमिरेबाट प्राप्त गरेको स्मरण गर्दै गच्छादारले अहिलेसम्म ५ हजारभन्दा बढी नगरवासी लाभान्वित भइसकेको जानकारी दिए।
सेवा शुभारम्भपछि नगर प्रमुख गच्छादार स्वयंले पनि आँखा परीक्षण गराएका थिए। कार्यक्रममा उप–प्रमुख मेनुका खतिवडा, स्वास्थ्य शाखा प्रमुख बिन्देश्वर महतो, प्रशासन अधिकृत उचित साह, अस्पताल प्रमुख अमित अग्रहरी, वडा अध्यक्षहरू र जनप्रतिनिधिहरूको उपस्थिति रहेको थियो।
