धनगढी । डोटीको सायल गाउँपालिकाले रसुवाका बाढी प्रभावित नागरिकको राहत तथा पुनर्स्थापनाका लागि प्रधानमन्त्री दैवी प्रकोप उद्धार कोषमा १ लाख ११ हजार १११ रुपैयाँ आर्थिक सहयोग गर्ने निर्णय गरेको छ।
गाउँपालिका अध्यक्ष धर्मराज जोशीका अनुसार बाढीपीडितको उद्धार, राहत तथा पुनर्स्थापना कार्यमा ऐक्यबद्धता जनाउँदै शनिबार बसेको बैठकबाट उक्त रकम कोषमा जम्मा गर्ने निर्णय भएको हो।
यसैगरी, रसुवामा गएको बाढीमा परेर बेपत्ता भएका डोटीका दुई जना नागरिकको परिवारलाई खोजीकार्यका लागि गाउँपालिकाले आर्थिक सहायता दिने भएको छ। बेपत्ता रहेका शिखर नगरपालिका–४ का दीपक महरा र दिपायल सिलगढी नगरपालिका–७ का किर्तसिंह विष्टका परिवारलाई खोजीका लागि यात्रा तथा अन्य खर्चस्वरूप प्रतिपरिवार १०–१० हजार रुपैयाँ उपलब्ध गराइने अध्यक्ष जोशीले जानकारी दिए।
