काठमाडौं । नेपाल एसोसिएसन अफ टुर एन्ड ट्राभल एजेन्ट्स (नाट्टा) को आगामी निर्वाचन नजिकिँदै गर्दा अध्यक्ष पदकी उम्मेदवार युविका भण्डारी नेतृत्वको प्यानल चुनावी मैदानमा बलियो देखिएको दाबी गरिएको छ।
पर्यटन व्यवसायी, नाट्टाका सदस्य तथा मतदातासँगको अनौपचारिक संवाद र चुनावी गतिविधिको प्रारम्भिक आकलनका आधारमा भण्डारी नेतृत्वको प्यानलले उल्लेख्य समर्थन जुटाएको बताइएको छ। चुनावी अभियानका क्रममा सदस्यहरूसँगको भेटघाट तथा छलफललाई प्यानलले तीव्र बनाएको छ।
विभिन्न पर्यटन व्यवसायी तथा मतदातासँग गरिएको अनौपचारिक कुराकानीमा भण्डारी नेतृत्वको टिमप्रति सकारात्मक धारणा देखिएको दाबी गरिएको छ। यही समर्थन मतदानको दिनसम्म कायम रहे अध्यक्षसहित प्यानलका सबै उम्मेदवार विजयी हुन सक्ने चर्चा चुनावी वृत्तमा सुरु भएको छ।
अनौपचारिक मत आकलनमा भण्डारीले करिब २९९ देखि ३०० मतसम्म प्राप्त गर्न सक्ने प्रारम्भिक अनुमान गरिएको छ। तर यो कुनै आधिकारिक मत सर्वेक्षण वा प्रमाणित प्रक्षेपण भने होइन। मतदातासँगको संवाद, चुनावी अभियानको सक्रियता, उम्मेदवारको पहुँच तथा देखिएको समर्थनका आधारमा गरिएको अनौपचारिक अनुमान मात्र भएको बताइएको छ।
भण्डारी नेतृत्वको प्यानलले नाट्टाको डिजिटल रूपान्तरण, सदस्यका समस्या छिटो सम्बोधन गर्ने प्रविधिमैत्री प्रणाली, पर्यटन संस्थाबीच सहकार्य र एकता, सरकारसँग प्रभावकारी समन्वय तथा अन्तर्राष्ट्रिय संस्थासँग सम्बन्ध विस्तारलाई प्रमुख एजेन्डाका रूपमा अघि सारेको छ।
त्यस्तै, पर्यटनलाई नेपालको प्रमुख राष्ट्रिय उद्योगका रूपमा स्थापित गर्न आवश्यक नीतिगत पहल र व्यवसायीका साझा समस्या समाधान गर्ने विषयलाई पनि प्यानलले प्राथमिकतामा राखेको जनाएको छ।
चुनावी अभियानमा अध्यक्ष पदकी उम्मेदवार भण्डारीसँगै वरिष्ठ उपाध्यक्ष, उपाध्यक्ष, महासचिव, सचिव, कोषाध्यक्ष, सहकोषाध्यक्ष तथा कार्यसमिति सदस्यका उम्मेदवारहरू सदस्यहरूसँग प्रत्यक्ष भेटघाट र छलफलमा सक्रिय छन्।
प्यानलले आफूलाई व्यक्तिगत उम्मेदवारहरूको समूहभन्दा पनि अनुभव, नयाँ पुस्ताको ऊर्जा, व्यावसायिक प्रतिनिधित्व र साझा कार्ययोजनासहितको टिमका रूपमा प्रस्तुत गर्दै आएको छ।
यही आधारमा भण्डारी नेतृत्वको प्यानलले केही पदमा मात्र नभई सम्पूर्ण पदमा विजय हासिल गर्न सक्ने र ‘क्लिन स्वीप’ गर्न सक्ने चर्चा चुनावी वृत्तमा हुन थालेको छ।
यद्यपि, निर्वाचनमा अन्तिम निर्णय मतदाताको मतबाट हुने भएकाले वास्तविक परिणाम भने मतदान र मतगणनापछि मात्रै स्पष्ट हुनेछ। हाल देखिएको चुनावी माहोल, सदस्यसँगको भेटघाट तथा प्राप्त प्रतिक्रियाका आधारमा भने भण्डारी नेतृत्वको प्यानललाई बलियो दाबेदारका रूपमा प्रस्तुत गरिएको छ।
