काठमाडौं, २ असार । सन् २०२६ को फिफा विश्वकपका विजेता खेलाडीहरूले यसपटक विशेष सम्मान प्राप्त गर्नेछन्।
विश्वकपको इतिहासमै पहिलो पटक, उपाधि विजेता टोलीका खेलाडी तथा कर्मचारीहरूलाई ट्रफी र स्वर्ण पदकका साथै ‘च्याम्पियनसिप रिङ’ अर्थात विजेता औंठी पनि प्रदान गरिनेछ। फिफाले यसको औपचारिक घोषणा गरेको हो।
फिफाका अनुसार यो औंठी अमेरिकी खेलकुदको एक प्रसिद्ध परम्पराबाट प्रेरित छ र फुटबल विश्वकपमा पहिलो पटक यसको प्रयोग गरिन लागेको हो। खेलाडीहरूलाई उनीहरूको ऐतिहासिक जितको एक अद्वितीय चिनो प्रदान गर्नु नै यसको उद्देश्य हो।
यस च्याम्पियनसिप रिङको एक भागमा फिफा विश्वकपको ट्रफी रहनेछ भने अर्को भागमा विजेता टोलीका लागि विशेष रूपमा तयार पारिएको डिजाइन हुनेछ। प्रत्येक रिङमा एक विशिष्ट नम्बर हुनेछ र यसलाई सम्बन्धित खेलाडीका लागि विशेष रूपमा तयार पारिनेछ साथै यसका साथमा आधिकारिकताको प्रमाणपत्र पनि उपलब्ध गराइने छ।
अन्तिम खेल सकिने बित्तिकै विजयी टोलीका कप्तान र मुख्य प्रशिक्षकलाई एउटा अस्थायी औंठी प्रदान गरिनेछ। त्यसपछि सम्पूर्ण विजयी टोलीका लागि ३० वटा औंठीहरू तयार पारिने छन् । प्रत्येक औंठी सम्बन्धित खेलाडीका लागि विशेष रूपमा तयार पारिनेछ र पछि उनीहरूलाई आधिकारिक रूपमा हस्तान्तरण गरिनेछ।
यी औंठीहरूको सीमित संस्करणअन्तर्गत कुल २ हजार २६ थान उत्पादन गरिएको छ। तीमध्ये ३० वटा औंठी विश्व विजेता टोलीलाई प्रदान गरिनेछ भने बाँकी १,९९६ वटा आधिकारिक रूपमा इजाजतप्राप्त उत्पादनका रूपमा विश्वभरका फुटबल प्रशंसकहरूका लागि बिक्रीमा राखिनेछ।
यद्यपि, उक्त औंठी कसले बनाएको हो वा यसमा कुन धातु प्रयोग गरिएको छ भन्नेबारे आधिकारिक रूपमा केही खुलाइएको छैन। तैपनि, विभिन्न समाचारहरूका अनुसार यो १४ देखि १८ क्यारेट सुनबाट बन्नेछ र यसमा हीरा तथा अन्य बहुमूल्य रत्नहरू जडित हुनेछन्। गल्फ न्युजण्का अनुसार यस औंठीको मूल्य १ लाख ५० हजार डलरसम्म पर्न सक्छ ।
सन् २०२६ को फिफा विश्वकपको फाइनल खेल युरोपेली च्याम्पियन स्पेन र साविक विश्व विजेता अर्जेन्टिनाबीच हुने भएको छ। स्पेनले सेमिफाइनलमा बलियो फ्रान्सेली टोलीलाई पराजित गर्दै फाइनलमा आफ्नो स्थान पक्का गरेको हो। अर्जेन्टिना भने लगातार दोस्रो पटक र समग्रमा सातौं पटक विश्वकपको फाइनलमा पुगेको छ । उसले निकै रोमाञ्चक दोस्रो सेमिफाइनल खेलमा इङ्ल्यान्डलाई २–१ ले पराजित गरेर फाइनलमा सुरक्षित भएको हो ।
