नवलपरासी। पश्चिम नवलपरासीको जिल्ला प्रशासन कार्यालयले आज बुधबारदेखि आफ्नै भवनबाट सेवा दिन सुरुआत गरेको छ।
प्रमुख जिल्ला अधिकारी दीपकराज नेपालले पुरानो भवनलाई भत्काएर सोही ठाउँमा नयाँ भवन तयार गरिएको जानकारी दिए। तीन वर्षदेखि निर्माणाधीन प्रशासन कार्यालयले उद्योग वाणिज्य संघ नवलपरासीको भवनबाट सेवा दिँदै आएको थियो।
२०७९ चैतमा भवन निर्माणका लागि ठेक्का पाएको कम्पनीले २०८१ को पुस मसान्तसम्म काम सक्नुपर्ने थियो। तर, विभिन्न कारणले ठेकेदारले काम सम्पन्न गर्न नसकेपछि चालु आर्थिक वर्षभित्र निर्माण सम्पन्न गर्ने निर्णय भएको थियो।
सोहीअनुसार ठेकेदारले २०८२ चैत २६ गते औपचारिक रूपमा भवन हस्तान्तरण गरेको प्रजिअ नेपालले बताए। सुविधासम्पन्न तीनतले भवन सात करोड ८७ लाख ९२ हजारको लागतमा निर्माण सम्पन्न भएको हो।
