विराटनगर । यातायात व्यवस्था कार्यालय विराटनगरले लामो समयदेखि अवरुद्ध रहेको सवारीचालक अनुमतिपत्र (लाइसेन्स) वितरण तथा परीक्षा सञ्चालन सेवा पुनः सुरु गरेको छ।
गत भदौ २४ गते भएको ‘जेनजी आन्दोलन’ का क्रममा यातायात व्यवस्था विभागको केन्द्रीय ‘सर्भर’ प्रणालीमा क्षति पुग्दा यो सेवा ठप्प भएको थियो। विभागको सर्भर मर्मतपछि सञ्चालनमा आएसँगै विराटनगर कार्यालयबाट पनि सेवा प्रवाह सुरु गरिएको कार्यालयका सूचना अधिकारी गिरिराज पराजुलीले जानकारी दिए।सूचना अधिकारी
पराजुलीका अनुसार कार्यालयले नयाँ चालक अनुमतिपत्रका लागि लिखित तथा प्रयोगात्मक (ट्र्याल) परीक्षा समेत लिन सुरु गरिसकेको छ।
यसअघि कार्यालयले गत भदौ ३० गतेदेखि नै सवारी दर्ता, सवारी दर्ता खारेज, नामसारी तथा सवारी लगत कट्टालगायतका अन्य प्रशासनिक सेवाहरू सञ्चालनमा ल्याएको थियो। तर, सर्भरमा आएको प्राविधिक समस्याका कारण लाइसेन्ससम्बन्धी सेवा भने सुचारु हुन सकेको थिएन।
हाल कार्यालयमा सबै प्रकारका सेवा लिन दैनिक १५० देखि २०० जना सेवाग्राही आउने गरेका छन्। सेवाग्राहीको चापलाई व्यवस्थित गर्दै कार्यालयले हप्तामा तीनपटक सवारीचालक अनुमतिपत्रको परीक्षा सञ्चालन गर्ने व्यवस्था मिलाएको छ।
