बिराटनगर, मोरङ — भारतबाट अवैध रुपमा रजनिगन्धा ल्याउँदै गरेको अवस्थामा एक व्यक्तिलाई सुरक्षाकर्मीले मोटरसाइकल सहित नियन्त्रणमा लिएका छन्। मङ्सिर १४ गते बिहान ७ः१५ बजे बिराटनगर महानगरपालिका–१५ स्थित बिराटनगर भन्सार कार्यालयको ढाट नम्बर–१ मा खटिएको सशस्त्र प्रहरी बल, प्रस्तावित सीमा सुरक्षा गुल्म रानी मोरङको टोलीले जाँचपछि उक्त सामान बरामद गरेको हो।
को ३ प ९४०६ नम्बरको यामाहा मोटरसाइकलमा रजनिगन्धाको कृत्रिम सीट बनाइ भन्सार छली नेपालतर्फ ल्याउँदै गर्दा चालकले नाकामा खटिएको ड्युटी छल्न खोजेपछि सुरक्षाकर्मीले उनलाई समातेका हुन्। नियन्त्रणमा लिइएका सामान र मोटरसाइकलको भन्सार मूल्य कुल १ लाख ४० हजार रुपैयाँ तोकिएको छ।
जसमध्ये रजनिगन्धाको मूल्य ४० हजार रुपैयाँ तथा मोटरसाइकलको मूल्य १ लाख कायम गरिएको भन्सार कार्यालयले जनाएको छ।
उक्त घटनामा संलग्न मोरङ, बिराटनगर महानगरपालिका–१७ रानी बस्ने ४८ वर्षीय आलम मियालाई आवश्यक कारबाहीका लागि भन्सार कार्यालयमा बुझाइएको सशस्त्र प्रहरीले जानकारी दिएको छ।
