फिलिपिन्समा बाढी नियन्त्रण पूर्वाधारमा सरकारी खर्चसँग जोडिएको भ्रष्टाचार काण्डलाई लिएर राष्ट्रपति फर्डिनान्ड मार्कोस जुनियरको राजीनामा माग गर्दै राजधानी मनिलामा ठूलो प्रदर्शन भएको छ ।
किलुसाङ बयान कोन्ट्रा–कुराकोट वा भ्रष्टाचारविरुद्धको जनआन्दोलन (केबीकेके) ले आयोजना गरेको र्यालीमा १०औं हजार प्रदर्शनकारी सहभागी भएका समाचार संस्था रोयटर्सले जनाएको छ । राष्ट्रपति जुनियरले पूर्वाधार परियोजनाहरूबाट घुस लिएको दाबीले फिलिपिन्समा आक्रोश निम्त्याएको छ ।
‘ट्रिलियन–पेसो’ काण्डमा राष्ट्रपतिका सहयोगीहरूसहित शक्तिशाली राजनीतिज्ञहरूलाई बाढी नियन्त्रण पूर्वाधारको ठेक्काका लागि अर्बाैं पेसो घुस दिएको आरोप लगाइएको छ । २ सय ५० जनाभन्दा धेरै मानिसको ज्यान लिएको पछिल्ला दुई शक्तिशाली आँधीबाट भएको व्यापक क्षतिले जनआक्रोश निम्त्याएको खबरमा उल्लेख छ ।
राष्ट्रपति मार्कोसले यसै वर्षको वार्षिक राष्ट्र सम्बोधनमा भ्रष्टाचार काण्डको खुलासा गर्नुभएको थियो । उहाँले सन् २०२२ पछि शुरू भएका ९ हजार ८ सय ५५ बाढी नियन्त्रण परियोजनामध्ये धेरैमा ५० अर्ब पेसो बराबरको अनियमितता भएको भन्दै स्वतन्त्र आयोग गठन गर्नुभएको थियो । उहाँले भ्रष्टाचारलाई ‘भयानक’ भन्दै निर्माण मन्त्रीको राजीनामा समेत स्वीकार गर्नुभएको थियो ।
मिडिया धनी दम्पती सारा र प्यासिफो डिस्कायाले सिनेट सुनुवाइका क्रममा कम्तीमा १७ सांसद र उच्च अधिकारीलाई ठेक्का दिलाउन ठूलो किकब्याक तिर्न बाध्य पारिएको खुलासा गरेका थिए ।
भ्रष्टाचारमा संलग्न कम्तीमा तीन इन्जिनियर बर्खास्त भएका छन् भने १५ जनामाथि थप अनुसन्धान भइरहेको छ । सबैले आपराधिक मुद्दा सामना गर्नेछन् र उनीहरूको सम्पत्ति, घर, कार र बैंक खाता फ्रिज गरिने खबरमा उल्लेख छ ।
